“Эр хүн тугал ч хариулдаг туг ч барьдаг” гэсэн мэргэн үг бий…Амьдралын хатууг амсч, аливаа хүндэд нухлагдах нь төрийг жолоодох хар ухааныг суулгаж, нугаршгүй зориг, харьшгүй тэмцлийн галыг асаадаг бололтой юм. Гэвч ядмагхан сэтгэлтэй, явцуу зорилготой улс төрчид төрийн ноён нурууг хэврэгшүүлж, аминч үзлээр ирээдүйг харж, амьдралын аар саархан явдалд цагаа гарздах нь бишгүй олон. Ийм улс төрчид “авлига” хэмээх биегүй чөтгөртэй сэм найзалж, төр түмнийхээ өмнө нүгэл үйлдэж буйгаа мэдсэн ч мэдээгүй юм шиг царайлдагаараа нэг хортой. Гэхдээ төрөө чимээгүйхнээр хэмлэдэг эдгээр улстөрчидтэй тэмцдэг зориг зүрхтэн ч цөөнгүй бий л дээ. Тэдний нэг бол Өмнөд Солонгосын Ерөнхийлөгч Но Му Хён. Энд түүний нэрийг онцлохын учир бий. Тэрээр авлигатай хатуу ширүүн тэмцэж, үүний эсрэг бүхэл бүтэн хороо байгуулан ажиллаж, цогц бодлого явуулсны дүнд багагүй амжилтад хүрчээ. Тэгэхдээ бүр өөрөө Ерөнхийлөгч болсон ч өрөөлийг энэ ажилд зүтгүүлж буй нь авлигал, хээл хахуультай “Ариун дайн” зарласны илрэл гэлтэй. Нобелийн энх тайвны шагналт Ерөнхийлөгч Ким Дэ Жуны орыг залгамжилсан Но Му Хён өнөөдөр дэлхийн бодлого тодорхойлогчдын нэг болжээ. Амаргүй албыг авснаас хойш түүнд бишгүй олон саад тулгарч байсан. Гэвч “Үнэнээр явбал үхэр тэргээр туйлай гүйцдэг”-ийн адилаар нэр төр нь сэвтэлгүй, харин ч байр суурь нь улам бэхжжээ. Но Му Хён 1946 оны наймдугаар сарын 6-нд Гёнгсангнамын Гимхай хэмээх жижиг тосгонд төржээ. Ядуу тарчиг амьдралтай ч фермерийн багавтар аж ахуй эрхэлдэг эцэг эх нь түүнийг боловсролтой болгохын төлөө хамаг байдгаа шавхан зүтгэдэг байлаа. Жаалхүү энэ бүхнийг сайн ойлгодог байсан тул үнэнч шударга, ажилсаг, өөртөө итгэлтэй нэгэн болж хүмүүжсэн байна. Тиймдээ ч шударга бус зүйлтэй эвлэрдэггүй зан нь тун ч зоримгоор илэрдэг байж. Дунд сургуульд байхаад нь нэгэн тэмцээн болжээ. Гэтэл баян айлын хүүхдийг улаан цайм шалгаруулав. Хоёрдугаар байранд орсон Но Му Хёний хор шар хөдөлж, шагнал гардуулах ёслол дээр шүүлт шударга бус болсныг товхийтэл хэлж орхиод шагнал авахаас татгалзаж буйгаа хэлсэн гэдэг. Түүний энэ шударга, ил тод чанар нь хожим төрийн ялзралтай тэмцэхэд нөлөөлсөн нь дамжиггүй. Тэрээр онц сурлагатан байсан тул Пусаны ахлах ангийн сургуульд тэтгэлгээр сурч байжээ. Сургуулиа төгсөөд нэгэн компанид ажиллаж байгаад хуульч болохоор эргэлзэлгүй шийджээ. Хуулийн сургуульд орохоосоо өмнө тэрээр цэргийн алба хааж, улмаар тосгоныхоо бүсгүй Вон Ян Суктай гэр бүл болсон аж. Тэр хоёр бие биенийгээ хүүхэд байхаас л таньдаг байжээ. Вон Ян Сук бол дундаж амьдралтай, жирийн Солонгос гэр бүлээс гаралтай. Түүнийг солонгосчууд ихэд хүндэтгэдэг юм билээ. Тэргүүн хатагтай болмогц нь өндөр сэтгэгдэлтэйгээр хүлээн авч, сайхан сэтгэлтэй ухаалаг эмэгтэй хэмээн магтан ярьж байсан. Нөхрөө ерөнхийлөгчөөр сонгогдонгуут тэрээр “Би гэрийн эзэгтэйгээс гадна улсын тэргүүн хатагтайн албыг давхар хаших боллоо” хэмээн ярьсан нь үүнд нөлөөлсөн биз ээ. Но Му Хён 1975 онд хуулийн шалгалтаа амжилттай өгч, 1977 оноос нэгэн дүүргийн шүүгчээр ажиллаж эхэлсэн байна. Гэвч ердөө найман сар ажиллаад хуулийн зөвлөгөө өгдөг хувийн компани байгуулжээ. Энэ нь тухайн үеийн шүүхийн тогтолцоо таалагдаагүйтэй холбоотой гэж тэр хожим дурссан нь бий. 1980-аад онд оюутнууд Засгийн газрынхаа үйл ажиллагааг эсэргүүцэн томоохон хөдөлгөөн өрнүүлдэг байжээ. Тэр үед Но Му Хён бослого дэгдээсэн оюутнуудыг шүүх үед өмгөөлөгчөөр ажиллаж байжээ. Хүний эрхийг зөрчсөн олон үйлдлийг өөрийн биеэр мэдэрсэн тэрээр үүний төлөө л тэмцэх ёстой хэмээн ойлгож. 1987 онд Пусаны оршин суугчдын зөвлөлийн тэтгүүлэгчээр ажиллаж байх үед нь “Зургаадугаар сарын мөргөлдөөн” нэртэй оюутнуудын томоохон эсэргүүцлийн ажиллагаа болсон юм. Эсэргүүцлийн ажиллагааны толгойлогч нь Но Му Хён байв. Засгийн газрын эсрэг оюутнуудын толгойлсон хэргээр түүнийг шоронд хорьж, эрүү шүүлт тулгаж байсан гэдэг. Гэвч энэ бүхнээс ухарч няцаагүй. 1988 онд XIII дугаар Үндэсний ассамблейд сонгогдон 1991 оноос Ардчилсан намын Ерөнхий нарийн бичгийн дарга, 1993 оноос Шинэ Мянганы Үндэсний Ардчилсан намын төв хорооны байнгын гишүүн, 1996,1998 онуудад Эв нэгдлийн хорооны гишүүн, Үндэсний конгрессын дэд Ерөнхийлөгч, 1998 онд Сөүлийн Жонго дүүргийн 15 дугаар Үндэсний чуулганаар Үндэсний конгрессын гишүүн зэрэг өндөр албан тушаал хашжээ. Түүний улс төрийн байр суурь өдөр ирэх бүр бэхжиж байлаа. 2002 он бол түүний улс төрийн амьдралд эргэлт гарсан үе. Бүх нийтийн санал асуулгаар БНСУ-ын 16 дахь Ерөнхийлөгчөөр сонгогдон ард түмнийхээ итгэлийг хүлээсэн юм. Но Му Хёныг сонгогдсоны маргааш өдөр нь анхны цас орсон бөгөөд тэрээр “Ард түмнийхээ яг л энэ шинэ цас шиг улс төрийн бодлогыг амлаж байна” гэж мэдэгджээ. Түүний тангараг өргөх ёслолын ажиллагаанд 45 000 гаруй хүн уригдсан гэдэг. Но Му Хён Ерөнхийлөгч болсноос хойш Ким де Жуны “Нарны бодлого”-ыг үргэлжлүүлж олон арван жил зогсчихоод байсан хоёр Солонгосын харилцааг хөгжүүлэхийн төлөө ажилласан. Түүнээс гадна Но Му Хёны Ерөнхийлөгч байхдаа хийсэн нэг том алхам нь Умард Солонгосын удирдагч Ким Чен Иртэй хэлэлцээ хийсэн явдал. Солонгосын хойгийн дайнаас хойш энэ хоёр улс ингэж дотносч байгаагүй. БНСУ-ын Ерөнхийлөгчийн гурав хоног үргэлжилсэн айлчлалын хамгийн сүүлчийн өдөр БНАСАУ-ын удирдагч Ким Чен Ир, Но Му Хён нар Энх тайвны тунхаг бичигт, мөн эдийн засгийн салбар дахь хамтын ажиллагааг улам нягт болгох тухай гэрээнд гарын үсэг зурлаа.Энх тайвны тунхаг бичигт чухам юун тухай дурдсан талаар сэтгүүлчдэд тодорхой мэдээлэл өгсөнгүй. Ямар ч байсан найман заалтаас бүрдсэн бөгөөд хамгийн гол нь мөнхийн энх тайвны гэрээ байгуулахын тулд дөрвөн талын дээд хэмжээний уулзалтыг зохион байгуулах тухай дурдсан аж. Өөрөөр хэлбэл БНСУ, БНАСАУ-ын харилцааг хэвийн болгох хэлэлцээнд АНУ, БНХАУ нэгдэх юм байна. 1953 онд хоёр Солонгосын дайн дууссаны дараа тус хоёр улс нь харилцан довтлохгүй байх тухай Эвлэрлийн гэрээ л байгуулсан билээ. Ким Чен Ир, Но Му Хён нар Шар тэнгист буюу хоёр улсын Солонгосын хойгийн баруун хэсэгт энх тайвны бүс байгуулахаар тохиролцжээ. БНСУ-ын тал хоёр улсыг холбосон төмөр замаар ачааны галт тэргийг тогтмол явуулж байхаа тохиролцсон. Энэ нь БНСУ-ын хувьд маш чухал. Учир нь энэ төмөр зам нь Сибириэр дайран өнгөрдөг төмөр замтай холбоотой бөгөөд ингэснээр тус улс Оросоор дамжин Европ руу гарах боломж нээгдэх юм. Хамгийн гол нь Ким Чен Ир, Но Му Хён нар дээд хэмжээний уулзалтын үеэр БНАСАУ-ын цөмийн хөтөлбөрийг зогсоох хүсэлтэй байгаагаа илэрхийлсэн явдал. Ингэснээр Солонгосын хойг нь цөмийн зэвсэггүй бүс болно гэсэн үг. Айлчлалын үеэр Но Му Хёны нэг сэтгэл хөдөлгөм үйл явдал болсон. Но Му Хен 2007-10-02-ны өглөө, хоёр солонгосыг заагласан 38р өргөрөгийн хилийн боомтоор гарч БНАСАУ ын нутагт хөл тавьсан тухай, дэлхийн хэвлэл мэдээллийн хэрэгслүүд уламжилж байна. БНСУ ын ерөнхийлөгч Но Му Хен хоёр солонгосыг 1953 оноос хойш зааглаж байгаа хилийн зураасыг давхынхаа өмнө үдэн гаргаж өгч байгаа сэтгүүлчдэд хандан товч мэдэгдэл хийсэн. Тэрбээр сэтгүүлчид өгсөн ярилцлагадаа “Өнөөдөр би энэ шугамыг явган давлаа. Миний араас мянга мянган иргэн энэ шугамаар давж элгэн садантайгаа уулзах болно” хэмээсэн байна. 2000 онд БНСУ-ын Ерөнхийлөгч Ким Дэ Жун анх Пенъянд айлчилсаныхаа төлөө Нобелийн шагнал авч байсан. Но Му Хёнийх хүү, охин хоёртой жирийн л сайхан айл.
МЕГА БИШ МИНИ ШИЙДЭЛ РҮҮ ЯВАХ ЦАГ!
1 month ago
0 comments:
Post a Comment